Rúmlega 3600 manns hafa skráð sig í hóp á Facebook sem heitir einfaldlega „Við neitum að borga skuldir sem við berum ekki ábyrgð á! (Icesave-málið)“. Hópurinn var stofnaður klukkan níu á föstudagskvöldið síðasta og fyrsta sólarhringinn skráðu þrettán hundruð manns sig.

„Bresk stjórnvöld hafa með fulltingi Evrópusambandsins beitt harðræði, og í sumum tilfellum hreinu og kláru ofbeldi, til þess að fá okkur til þess að taka á okkur alla ábyrgð á starfsemi bankanna m.a. með beitingu hryðjuverkalaga gegn hagsmunum íslenskra fyrirtækja í Bretlandi sem og hagsmunum íslenska ríkisins.

Breskir ráðamenn hafa neitað að samþykkja að málið verði útkljáð fyrir dómstólum vegna þess að þeir óttast niðurstöðuna. Sama á við um Evrópusambandið sem er full kunnugt um ábyrgð sína í málinu vegna meingallaðs lagaumhverfis sem við tókum upp hér á landi í gegnum EES-samninginn.

Evrópusambandið veit að það gæti sett allt innlánskerfið í ríkjum þess í uppnám ef dómstóll úrskurðaði okkur Íslendingum í vil. Því hefur verið lagt allt kapp á að kúga okkur til þess að fallast skilyrðislaust á kröfur breskra og hollenskra stjórnvalda í málinu. Okkar hagsmunum er einfaldlega fórnað,“ stendur á síðunni.

Forráðamenn síðunnar krefjast aðgerða.

„Ríkisstjórn Íslands hefur nú svo gott sem lagt blessun sína yfir þennan ráðahag. Það er ekki gert í okkar nafni. Við neitum að borga skuldir sem við berum ekki ábyrgð á. Við krefjumst þess að málið verði leitt til lykta fyrir þar til bærum hlutlausum dómstóli!“