Íslenska landsliðið í knattspyrnu tapaði fyrir því hollenska í undankeppni HM í gær. Ísland flaug í dag til Makedóníu þar sem það leikur næsta leik eftir fjóra daga. „Samt var bærinn fullur af fullum landsliðsmönnum í gær,“ skrifar Steingrímur Sævarr Ólafsson á bloggsíðu sína og furðar sig á því hvernig leikmenn liðsins geta verið fullir svo stuttu fyrir leik.

„En hvers vegna í ósköpunum eru landsliðsmenn blindfullir á skemmtistöðum Reykjavíkurborgar fjórum dögum fyrir næsta leik? Hefur ekki verið gerð eina eða jafnvel tvær rannsóknir um áhrif áfengis á líkamann?

Hér verða ekki nefnd nein nöfn af tillitssemi við leikmenn og aðstandendur.

Það verður forvitnilegt að sjá úrslitin á miðvikudag.“

Þess má geta að skemmtistaðnum Sólon var lokað í einhvern tíma í gær þar sem hollenska landsliðið lyfti sér upp.