Eiríkur Bergmann Einarsson, stjórnmálafræðingur við Háskólann á Bifröst, segir að Bretar séu glaðir með Icesave samkomulagið – enda hafi þeir unnið fullnaðarsigur í málinu. „Íslensk stjórnvöld gera samkomulagið í þeirri veiku von að eignir Landsbankans dugi langleiðina upp í ógnarskuldina, heila 650 milljarða íslenskra króna. Hér er þó engan veginn á vísan að róa, enginn veit hvert virði eignanna eða gengi krónunnar verður í framtíðinni,“ segir Eiríkur á bloggsíðu sinni í færslu sem ber yfirskriftina Iceslave samkomulagið.

Eiríkur segir að það veki athygli að Íslendingar beri alla áhættuna en Bretar gangi frá samningaborðinu með „bæði axlabönd og belti“. Hann segir að íslensk stjórnvöld hafi fengið gullið tækifæri til að varpa ábyrgðum á Icesave-skuldunum yfir á bresk stjórnvöld um leið og þau beittu hryðjuverkalögum og frystu eignir bankans í Bretlandi.

„Því er óskiljanlegt að íslensk stjórnvöld hafi samþykkt að skuldbinda þjóðina á klafa skulda sem augljóslega eru á ábyrgð þeirra Alistair Darlings og Grodon Browns. Menn skyldu hafa í huga að þetta er ekki aðeins lagalegt álitamál, heldur pólitískt: Alþjóðastjórnmál lúta öðrum lögmálum heldur en innalandsstjórnmál og þjóðarréttur er mun loðnara fyrirbæri en landsréttur.“

Færsla Eiríks