„Okkar ásetningur er að koma frumvarpi fyrir þingið í lok þessarar viku og síðan stóru áætluninni mjög flótlega þar á eftir,“ sagði Steingrímur J. Sigfússon fjármálaráðherra að loknum fundi með fulltrúum vinnumarkaðarins í fjármálaráðuneytinu í dag.

Í kvöldfréttum RÚV kom fram að Alþingi verði í lok vikunnar kynnt hvernig ríkisstjórnin ætlar að ná fram tuttugu milljarða króna sparnaði á þessu ári. Steingrímur segist bjartsýnn á að þetta verði til þess að Seðlabankinn lækki stýrivexti fyrir næsta vaxtaákvörðunardag en síðar í þessum mánuði verður kynnt skýrsla um 170 milljarða sparnað á næstu þremur árum.

Stíf fundarhöld voru í fjármálaráðuneytinu og húsnæði ríkssáttasemjara í dag.