Guðmundur Ingi Hauksson, fyrrverandi útibússtjóri Landsbankans í Austurstræti, segist í samtali við DV í dag ekkert kannast við greiðslurnar tvær frá Knerri inn á reikninga Sigurðar Björns Sigurðarssonar og þáverandi eiginkonu útibússtjórans, Sigríðar Sveinsdóttur. Guðmundi var vikið úr starfi sínu á miðvikudaginn vegna aðkomu sinnar að málinu. Millifærslurnar líta út fyrir að vera greiðslur til Guðmundar í staðinn fyrir lánveitingar til eignarhaldsfélagsins Knerris frá Landsbankanum.

„Vegna bankaleyndar get ég ekkert tjáð mig um þetta félag né önnur sem eiga í viðskiptum við bankann,“ segir útibússtjórinn fyrrverandi í viðtali við blaðið í dag. Viðskiptin áttu sér stað í apríl og október á árinu 2005. Knerrir fékk lán upp á 20 milljónir króna frá Landsbankanum til að kaupa hlutabréf í bankanum. Bréfin hækkuðu í verði frá því í apríl og fram í október þegar þau voru seld. Sjö milljónir af tæplega 8 milljóna hagnaði af hlutabréfakaupunum voru lagðar inn á reikninga Sigurðar og Sigríðar nokkrum dögum eftir sölu hlutabréfanna.

Í samtali við DV í dag segir Sigríður ekkert kannast við milljóna millifærsluna inn á reikninginn hennar. „Ég var flutt til útlanda þegar þetta var og veit ekkert um þetta mál... Ég var gift á þessum tíma og maðurinn minn hafði aðgang að mínum reikningi. Ég man ekki eftir þessu, hvorki þessu innleggi né úttektinni,“ segir Sigríður. Sigurður segir það sama í samtali við blaðið.

Landsbankinn sendi frá sér tilkynningu í gær þar sem fram kom að mál Guðmundar hefði verið sent til Fjármálaeftirlitsins og efnahagsbrotadeildar Ríkislögreglustjóra.