Gary Taylor, eigandi MJJcommunity.com, eins af aðdáendaklúbbum Michael Jacksons á netinu, segir að að minnsta kosti tólf einstaklingar hafi framið sjálfsmorð vegna fráfalls poppkóngsins. Taylor segir ástandið grafalvarlegt.

„Ég veit að það hefur verið aukning sjálfsmorða. Ég held að talan sé núna tólf,“ sagði Taylor við blaðamenn vestan hafs í gær.

„Þetta fólk er að fara í gegnum mjög alvarleg vandamál en Michael Jackson hefði ekki viljað þetta. Hann hefði viljað að þau myndu lifa.“

Presturinn Jesse Jackson, náinn vinur poppkóngsins, hefur líka reynt að ná til fólks í gegnum Youtube og hvatt fólk til að taka dauðsfall Jacksons ekki það nálægt sér að það svipti sig lífi.

„Við skulum lifa saman sem bræður og systur í nafni Michaels en ekki deyja sundruð eins og fífl,“ segir presturinn.