Karlmaður um þrítugt hefur setið í gæsluvarðhaldi undanfarnar þrjár vikur grunaður um að nauðga konu í heimahúsi í Hafnarfirði. Samkvæmt heimildum DV hitti maðurinn, sem er af erlendu bergi brotinn, konuna, sem er íslensk, á skemmtistað í miðbæ Reykjavíkur.

Aðalmeðferð í málinu fór fram í Héraðsdómi Reykjavíkur í morgun og neitaði maðurinn sök samkvæmt heimildum DV. Maðurinn játaði að hafa haft samfarir við konuna en sagði að það hafi verið með hennar vilja. Maðurinn var úrskurðaður í gæsluvarðhald í kjölfar þess að málið kom upp og rennur úrskurðurinn úr gildi þann tíunda júlí, eða sama dag og dómur verður kveðinn upp.