Michael Jackson setti dauða sinn á svið til að losna undan álagi frægðarinnar. Þetta segja æstir aðdáendur poppkóngsins sem trúa því að goðið sé á lífi. Þúsundir aðdáenda hafa skrifað brjálæðislegar samsæriskenningar inn á hinar ýmsu vefsíður síðan kóngurinn lést. Mátti svo sem búast við þessu þar sem margir aðdáendur Elvis Presley halda enn að hann sé á lífi.

Ein þessara vefsíðna, michaeljacksonsightings.com, hefur birt mynd og heldur því fram að hún sé af Jackson á sunnudaginn, þremur dögum eftir andlát hans. Ekki er hægt að sjá andlit meints Jacksons og engin sönnun fylgir að myndin sé ný.

Á síðunni er sagt að maðurinn sem lést á fimmtudaginn sé tvífari Jacksons sem þjáðist af banvænum sjúkdómi og hugsað verði um fjölskyldu hans í staðinn.

Önnur vefsíða heldur því fram að Jackson hafi verið búinn að skipuleggja andlátt sitt í eitt og hálft ár og sé nú í felum í Austur-Evrópu.

Þriðja síðan segir að sést hafi til Jacksons að fara yfir mexíkósku landamærin klukkustundum eftir að fréttir af dauða hans brutust út.

Engar sannanir fylgja þessum staðhæfingum.