Þéttvaxinn maður í blúndubrjóstahaldara og gallabuxum olli talsverðum usla í Holsted á Vestur-Jótlandi í Danmörku í dag. Hann stillti sér upp hjá salerni þar sem ferðalangar geta stoppað við ef þeim er mál og bauð gestum og gangandi munnmök.

35 ára manni frá Esbjerg blöskraði svo boðið að hann tilkynnti það lögreglu eins og segir á fréttavefnum bt.dk.

Að sögn lögreglunnar í Esbjerg er þéttvaxni maðurinn á aldursbilinu 35 til 40 ára og keyrði á grárri Mözdu. Lögreglan náði ekki tali af manninum í dag en myndi gjarnan vilja tala við hann. Lögreglan er enn í vafa um hvort athæfi hans sé ólöglegt.

Maðurinn í brjóstahaldaranum lofaði að koma aftur á sama stað á morgun og því ekki ólíklegt að lögreglan nái tali af honum þá.