Héraðsdómur Reykjavíkur úrskurðaði í hádeginu að húsleit Efnahagsbrotadeildar ríkislögreglustjóra á tveimur heimilum Hannesar Smárasonar að Fjölnisvegi 9 og 11 hafi verið lögmæt.

Hannes fór fram á að húsleit og haldlagning gagna á heimili hans yrði úrskurðuð ólögleg.

Efnahagsbrotadeild ríkislögreglustjóra gerði húsleit á heimilum Hannesar 3. júní í tengslum við möguleg skattalagabrot félaganna Oddaflugs og Primusar sem Hannes Smárason átti að sögn Morgunblaðsins.

Auk þess að gera húsleit á heimilum Hannesar var gerð húsleit á lögmannsstofunni Logos. Gunnar Sturluson sem er einn stjórnenda Logos var framkvæmdastjóri og sat í stjórnum félaganna Oddaflugs og Primusar.

Oddaflug heitir í dag EO eignarhaldsfélag og Primus heitir FI fjárfestingar. FI fjárfestingar er skráð með 3,1 prósent hlut í BYR.