„Lánshæfiseinkunnir Íslands sem um árabil voru fyrsta flokks og á pari með lánshæfiseinkunnum nágrannaríkja okkar í V-Evrópu hafa nú aldrei verið lægri og eiga fátt sameiginlegt lengur með okkar hefðbundnu samanburðarþjóðum,“ segir í morgunkorni greiningadeildar Íslandsbanka í dag.

Þar segir að nú séum við í sama flokki og nýmarkaðsríki Austur Evrópu sem mörg rambi nú á brún óviðundandi áhættu eftir að hafa horft upp á lánshæfiseinkunnir sínar hríðfalla í kreppunni.

„Búlgaría, Króatía, Ungverjaland og Kasakstan eru öll með mjög svipaðar lánshæfiseinkunnir og Ísland um þessar mundir og eru einkunnir þeirra á neikvæðum horfum og bíða endurskoðunar. Búlgaría hefur fallið niður í lægsta þrep B flokks hjá bæði Moody´s og Fitch vegna vaxandi áhættu á greiðslufalli og er á neikvæðum horfum hjá S&P. Króatía féll niður í BBB hjá S&P í vor vegna versnandi viðskiptahalla og lausafjárstöðu og skorts á aðgerðum stjórnvalda til að bregðast við vandanum,“ segir í morgunkorninu.

„Ungverjaland og Kasakstan er líkt og Ísland aðeins einu stigi fyrir ofan áhættuflokk í bókum tveggja lánshæfismatsfyrirtækja og eru líkt og Ísland á neikvæðum horfum. Rússland er skörinni hærri en Ísland með einkunnina BBB í bókum S&P og Fitch en deilir flokki með Íslandi í bókum Moody´s og er með einkunnina Baa1.“