Bretar hafa rekið tvo íranska diplómata úr landi eftir að Íranir ráku tvo breska diplómata úr landi í gær. Gordon Brown tekur því auga fyrir auga í samskiptum sínum við Íran þar sem enn logar skálmöld eftir forsetakosningarnar.

„Íranir gripu til þess ósanngjarna ráðs að vísa tveimur breskum diplómötum úr landi vegna ásakana sem áttu sér enga stoð í raunveruleikanum,“ sagði Gordon Brown við breska þingmenn í dag.

„Til að svara þeim aðgerðum höfum við tilkynn íranska sendiherranum í dag að við munum vísa tveimur írönskum diplómötum úr sendiráðinu í London. Það veldur mér miklum vonbrigðum að Íranir hafi þvingað okkur til að bregðast við með þessum hætti,“ sagði forsætisráðherrann.

Mahmoud Ahmadinejad, nýendurkjörinn forseti Írans, sagði á sunnudagin að Bandaríkin og Bretland ættu að hætta að skipta sér að innanríkismálum landsins. Sautján manns hafa látið lífið í mótmælum við úrslitum forsetakosninganna í Íran þann 12. júní síðastliðinn.