Björgólfur Thor Björgólfsson hefur loksins svarað opnu bréfi ritstjórans Illuga Jökulssonar sem hann birti hér á bloggsíðu sinni á DV.is.

Fyrirspurn Illugi, sem birtist á bloggsíðu hans þann 20. júní, var svo hljóðandi í stuttu máli:

„Nú þegar ljóst virðist að mjög háar upphæðir falli á þjóðina, vegna þeirrar peningamaskínu þinnar og þinna sem Icesave var, munt þú þá ekki örugglega leitast af fremsta megni við að borga þá alla upphæð sem afgangs verður þegar eignir Landsbankans hafa verið seldar?“

Opið bréf Illuga til Björgólfs Thors í heild sinni hér.

Hugsar daglega um Icesave-klúðrið
Björgólfur Thor segir, líkt og Illugi bendir á í bréfi sínu, að Landsbankinn hafi aldrei verið þungamiðjan í hans “bissness.” Hann hafi aldrei verið í bankaráði og líkt og aðrir hluthafar Landsbankans hafi hann treyst stjórnendum bankans og bankaráðinu fyrir hlutafé og þá um leið starfsemi bankans.

„Engu að síður er það svo að ekki líður sá dagur að ég hugsi ekki um þetta Icesave klúður. Ég velti því fyrir mér hvernig sé best að lenda þessu máli þannig að ekkert falli á endanum á þjóðarbú Íslendinga og almenningur þurfi ekki að greiða af þeim ábyrgðum sem ríkið hefur gengist í. Eins og ég hef sagt opinberlega áður þá tel ég góðar líkur á því að eignir Landsbankans dugi fyrir þessum upphæðum. Ég mun fylgjast vel með gangi þess eins og allir Íslendingar,“ skriftar Björgólfur Thor.

Björgólfur segir að hann vilji að skoðað verði hvort að á næstu sjö til fimmtán árum verði ekki hægt að koma íslenska ríkinu út úr ábyrgðum þess vegna Icesave og „leysa þar með áhyggjur þjóðarinnar af þessu máli.“ Björgólfur segir sjö ár vera langan tíma í viðskiptum og margvísleg tækifæri kunni að skapast til að auka verðmæti eignasafns Landsbankans sem og að ná niður ábyrgðum ríkisins.

„Ljóst er að okkar besta fólk þarf að standa vaktina því mikið er í húfi og hafa í huga að öll fljótfærni við ákvarðanatöku getur haft neikvæð áhrif í framtíð.“

„Ég geri mér því vonir um að fyrr en seinna liggi fyrir á opinberum vettvangi hvers vegna mál þróuðust á versta veg, hver var ábyrgð hverra, hverjir fóru offari og hverjir sváfu á verði, hvort farið var á svig við lög og reglur, og þá einnig td. hvort ég “naut góðs” af þeirri “”tæru snilld” sem (Icesave) reikningarnir þóttu vera,”“ skrifar Björgólfur Thor.

Vill gera það sem hann getur til að Icesave falli ekki á almenning
Björgólfur segir að á meðan unnið sé að þessum málum telji hann ekki rétt að hann sé að tjá sig mjög mikið á opinberum vettvangi.

„Ég vona að þú skiljir þetta sjónarmið mitt. En til að svara spurningu þinni á þann einfalda hátt sem þú óskar get ég aðeins sagt: Já, ég vil af einlægni gera það sem ég get til þess að Icesave skuldir falli ekki á íslenskan almenning.“

Björgólfur segist hins vegar hafa þá reglu að lofa ekki öðru en því sem hann getur staðið við og það eigi við hér einnig.

„Þá vil ég minna á og endurtaka það sem ég hef áður sagt að ég vil gera mitt til að hjálpa Íslandi við að rétta úr kútnum efnahagslega. Það besta sem ég hef upp á að bjóða er möguleikinn á að fá erlenda fjárfesta til að taka þátt í uppbyggingu á íslensku atvinnulífi. Að því vinn ég um þessar mundir.“

Hefur ekki hugmynd um fjárhagslega stöðu sína
„Það er rétt tilgetið hjá þér að ég hef ekki hugmynd um fjárhagslega stöðu mína núna og enn minni hugmynd um stöðu mína eftir sjö ár, sem þú minnist á í bréfi þínu. Nú vinn ég alla daga við að skapa verðmæti úr eignasafni mínu og árangur í því skiptir líka máli fyrir íslensku bankana og eru því hagsmunir íslensku þjóðarinnar og mínir þeir sömu í þeim efnum.“

Björgólfur Thor minnir síðan á orð sín í Viðskiptablaðinu á síðasta ári þar sem hann sagði að enginn íslenskur athafnamaður hefði komið með meiri fjármuni til Íslands en hann. Með yfirtöku á Actavis og sölu á eignum sem íslensk fyrirtæki fjárfestu með honum í á síðustu sjö árum hafi numið nærri 450 milljörðum króna sem borist hefðu til Íslands, til almennra fjárfesta, lífeyrissjóða, banka og íslenska ríkisins.

Svar Björgólfs Thors má finna í heild sinni hér á DV.is