Tæplega sex þúsund manns hafa skráð sig í hóp á Facebook sem heitir einfaldlega „Áfram Eva Joly“. Alls hafa 120 einstaklingar skrifað á vegg hópsins þar sem fólk segist meðal annars treysta Evu Joly og vill að hún kyrrsetji eignir auðmanna og uppræti spillingu á Íslandi.

Kröfur forráðamanna hópsins eru skýrar. Þeir vilja að „kröfum Evu Joly verði framfylgt og spillingin upprætt.“

Eva hefur gegnt starfi sem sérstakur ráðgjafi vegna rannsókna á efnahagsbrotum sem tengjast hruni fjármálakerfisins hér á landi. Eva er víðkunn af rannsóknum sínum á fjármálabrotum og fjármálaspillingu í Evrópu og víðar og gengdi áður stöðu rannsóknardómara í Frakklandi.