Sjö meðlimir tveggja mótorhjólagengja voru í gær dæmdir í sex ára fangelsi fyrir óspektir á flugvellinum í Birmingham í janúar á þessu ári. Þrír mannanna eru meðlimir í Hells Angels, eða Vítisenglum og fjórir þeirra í samtökunum Outlaws.

Mennirnir voru ákærðir fyrir heiftarleg ofbeldisverk á flugvellinum en einn maður hlaut alvarlega höfuðáverka og var um tíma óttast um líf hans. Mótorhjólasamtökin höfðu lengi eldað grátt silfur saman sem endaði í miklum slagsmálum á flugvellinum í Birmingham.

Dómarinn í málinu sagði að hann hefði ekki átt nokkurra kosta völ þegar hann ákvað refsingu yfir mönnunum. Þeir væru engin unglömb og slagsmálin hafi verið skipulögð fyrirfram.