„Kröfur samtakanna eru skýrar: 1. Stöðvum ICESAVE- samninginn 2. Mótmælum sinnuleysi stjórnvalda í málefnum heimila og fyrirtækja 3. Krefjumst þess að dómskerfið taki á hvítflibbaglæpamönnum,“ segir á heimasíðu Radda fólksins sem boðað hafa til mótmæla á Austurvelli í dag klukkan 15.

Er þetta þrítugasti útifundur samtakanna en þau fóru af stað skömmu eftir bankahrunið. Ræðumenn dagsins eru þau Andrea Ólafsdóttir, stjórnarkona í Hagsmunasamtökum Heimilanna og Jóhannes Þ. Skúlason, sagnfræðingur og grunnskólakennari. Fundarstjóri er sem fyrr Hörður Torfason.

Rúmir þrír mánuðir eru liðnir frá síðasta útifundi Radda fólksins en hann fór fram 14. mars.