Karlmaður sem braust inn á veitingastaðinn Portland Lobster í Maine í Bandaríkjunum þarf að venjast matnum í fangelsinu eftir að hann gerði vel við sig á staðnum eftir að hafa brotist inn.

Það var starfsfólk staðarins sem fann manninn sofandi í sófa á staðnum þegar það mætti til vinnu einn morguninn í þessari viku. Maðurinn hafði úðað í sig humri fyrir tugi þúsunda króna og hvítvíni af bestu gerð áður en hann leið út af í sófanum. Þá gleymdi hann að loka hurðinni á ísskáp á staðnum sem gerði það að verkum að mikið af mat fór til spillis.

Maðurinn, sem heitir Paul Bruneau, var handtekinn og á hann yfir höfði sér dóm fyrir innbrot og þjófnað.