Lögreglan á Akureyri hafði í nógu að snúast í nótt en hinir árlegu Bíladagar fara þar fram um helgina. Margt var um manninn í miðbæ Akureyrar í nótt en að sögn varðstjóra hjá lögreglunni gekk allt slysalaust fyrir sig þó mikið hafi verið kvartað undan hávaða. Fangageymslur eru fullar eftir nóttina.

Að sögn varðstjóra voru tveir ökumenn teknir grunaðir um akstur undir áhrifum fíkniefna. Annar þeirra hafði auk þess verið sviptur ökuréttindum áður og ók hann því réttindalaus. Tveir menn voru teknir grunaðir um ölvunarakstur. Þá voru níu teknir fyrir of hraðan akstur en sá sem hraðast ók mældist á 127 kílómetra hraða rétt utan við Akureyri, þar sem hámarkshraði er 90.