Fjölskyldur og aðstandendur þeirra sem létu lífið þegar Airbus þota Air France flugfélagsins fórst undan ströndum Brasilíu fyrir þremur vikum fá 24.500 dali, eða um 3,2 milljónir króna í bætur frá flugfélaginu fyrir hvern farþega sem lést.

Paul-Henri Gourgeon, framkvæmdastjóri flugfélagsins, segir að félagið muni einnig borga fyrir sálfræðimeðferðir fyrir aðstandendur þeirra sem létust. 228 létust í vélinni en enn er á huldu hvað olli því að vélin hrapaði. Ýmsum kenningum hefur verið varpað fram en sérfræðingar telja þó líkur á að vélin hafi brotnað í miðju flugi.