„Við þessi orð fékk Þór hláturskast,“ segir Birgitta Jónsdóttir, þingmaður Borgarahreyfingarinnar, á heimasíðu sinni eftir að Þór Saari og hún hittu fulltrúa í samninganefnd Alþjóða Gjaldeyrissjóðsins í gær. Þór hló að fulltrúanum eftir að hann spurði þau hvort þau ætluðu virkilega að leggja til að einangra þjóðina með því að skila AGS láninu, sjóðurinn teldi að Íslendingar gætu auðveldlega borgað allar skuldirnar.

Hún segir að Þór hafi um nokkurt skeið aðstoða lönd í Afríku „sem AGS hefur rústað með sínum einstaklega skynsamlegu aðferðum“. „ Hann taldi upp nokkur lönd sem AGS sagði nákvæmlega sama um og okkur og spurði fundargestinn um afdrif þeirra.

Birgitta segir að sér hafi komið mest á óvart að enginn í samninganefndinni hafi séð eignasafn Landsbankans. „Þeir sem hafa séð hverjar raunverulegu eignirnar sem eiga að ganga upp í skuldina risastóru eru endurskoðendaskrifstofan breska sem mat að hægt væri að endurheimta 95% af eignunum og landsstjórar landsins: AGS. Landsstjórinn tjáði samningsfólkinu að þetta væri traust eignasafn og sennilega borið þau traustu tíðindi til okkar ástkæru landshjúa Jóhönnu og Steingríms. Steingrímur þessi étur nú úr hendi AGS sem þægur ...... og hinn dæmalausi viðsnúningur hans verður seint útskýrður. Skora á hann að segja okkur hvað veldur.“

Birgitta segir að þau væru að verja hagsmuni þjóðarinnar og gætu ekki samþykkt að þjóðin yrði hneppt í kreppuástand til 2024 eða lengur. „Við sögðum þessari ágætu manneskju að það væri ekki hægt að bjóða þingmönnum né þjóðinni upp á það að samþykkja sem enginn hefur séð. Við sögðum henni að við myndum fella þennan gjörning með öllum tiltækum ráðum ef við fengjum ekki allt upp á borðið - hvert einasta pappírsbleðil svo hægt væri að taka upplýsta ákvörðun.“

Hún segir einnig að fulltrúinn hafi sagt að þeim sé kennt um allt. „„Þór spurði þessa ágætu nefndarmanneskju hvort að ef dæminu væri snúið við og ef hún væri í okkar sporum á hollenska þinginu, hvort að hún gæti hugsað sér að samþykkja slíkan samning: svarið var auðvitað eins og okkar: NEI. Ég spurði hvort að það væri rétt að hollendingar stæðu í vegi fyrir að þjóðin fengi að sjá samninginn og fékk svarið nei, og ekki nóg með það heldur féllu líka eftirfarandi orð: okkur er kennt um allt...“