Sigurjón Árnason var ráðinn sem stundakennari við Háskólann í Reykjavík til að kenna inngangskúrs í fjármálaverkfræði um síðustu áramót. Gunnar Guðni Tómasson forseti tækni- og verkfræðideildar segir að Sigurjón hafi verið ráðinn á faglegum forsendum vegna þekkingar hans og kunnáttu. Það sé annarra stofnana að dæma um hvort hann hafi gert eitthvað af sér í öðrum störfum.

Eftir að Sigurjón Árnason lét af störfum sem bankastjóri Landsbankans og hafði fengið 70 milljóna króna lán hjá eigin lífeyrissjóði tók hann að sér stundakennslu við Háskólann í Reykjavík. Sigurjón kenndi námskeiðið Inngangur að fjármálaverkfræði fyrir fyrsta árs nemendur í BS-námi í fjármálaverkfræði. Gunnar Guðni Tómasson forseti tækni- og verfræðideildar Háskólans í Reykjavík segir að Sigurjón hafi verið einn af um 100 stundakennurum sem ráðnir voru til starfa innan deildarinnar síðasta vetur.