Jóhanna Sigurðardóttir forsætisráðherra og Eurovision-stjarnan Jóhanna Guðrún Jónsdóttir eiga án efa ekki mikið sameiginlegt fyrir utan nafnið. En þrátt fyrir það komu stöllurnar saman í gær í tilefni að söfnunarátakinu Systralag á vegum Þróunarsjóðs Sameinuðu þjóðanna í þágu kvenna eða UNIFEM.

Þessar frægustu Jóhönnur landsins komu saman fyrir þetta verðuga verkefni og spjölluðu saman í dágóða stund við athöfnina og virtist fara vel á milli þeirra á meðan þær skrifuðu undir styrktarsamkomulag um mánaðarleg framlög. Forsætisráðherra spurði söngkonuna efnilegu hvort frami hennar hefði breyst eitthvað eftir Eurovision-velgengnina.