Systurnar Linda og Unnur Óskarsdætur sögðu ríkisstjórnina tvímælalaust leggja meiri áherslu á afkomu bankanna í landinu en heimilanna, þegar blaðamaður DV hitti þær í gær. Þær segja lítið hafa gerst eftir kosningarnar í apríl en höfðu þó fyrir ekki mikla trú á ríkisstjórnarflokkunum tveimur. Þær hafa fundið fyrir efnahagshruninu frá því í haust og missti Linda til að mynda vinnuna í kjölfar hrunsins.

„Ég er atvinnulaus í dag en ég vann í banka. Margir í kringum mig eru að missa húsnæðið, við höfum ekki séð neitt síðan ríkisstjórnin var mynduð.“

Linda segir ríkisstjórnina vera úti á þekju þar sem svo virðist sem menn séu að velta fyrir sér hlutunum. „Mér finnst verst af öllu frá þessu hruni að búið er að vera að tala um að allt eigi að vera gegnsætt og allt eigi að vera uppi á borðum, en síðan úrslitin lágu fyrir hef ég bara ekki heyrt neitt. Það eru engir almennilegir punktar, ekkert plan, bara vangaveltur. Við ætlum hugsanlega að gera þetta og þá kannski gerist hitt. Við viljum bara fá að vita hver vandinn er og hvernig á að takast við hann. Fá eitthvað almennilegt plan fyrir landið okkar.“