Vodafone lokar á Ringulreið

Vodafone hefur lokað fyrir aðgang að vefsíðunni ringulreid.org og er það í fyrsta sinn sem fyrirtækið grípur til slíkra aðgerða. Í tilkynningu frá Vodafone kemur fram að á vefsíðunni fari fram gróft rafrænt einelti og hafa margar kærur borist til lögreglu vegna myndbirtinga og ærumeiðandi ummæla á síðunni.

DV hefur haft síðuna til umfjöllunar nokkrum sinnum síðustu mánuði, meðal annars vegna grófra myndbirtinga á stúlkum undir lögaldri. Lögreglu hefur þó ekki tekist að hafa upp á ábyrgðarmönnum síðunnar, sem vistuð er erlendis þótt efni hennar sé íslenskt.

Ákvörðun Vodafone er tekin eftir að Ríkislögreglustjóri, Lögreglustjórinn á höfuðborgarsvæðinu, Barnaverndarstofa, samtökin Barnaheill, Heimili og skóli, SAFT, Lýðheilsustöð, umboðsmaður barna og Stígamót skoruðu á öll netþjónustufyrirtæki að loka fyrir aðgang að síðunni. Vodafone hefur látið kanna lögmæti þess að loka fyrir aðganginn og niðurstaðan er sú, að fyrirtækinu sé heimilt að grípa til lokunar.

Rétt er að taka fram, að hér er um einstakt og afmarkað dæmi að ræða, og ákvörðunin um lokun er á ábyrgð Vodafone en ekki ofangreindra aðila.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Mest lesið