Bjarni Ármannsson, forstjóri Glitnis, sendi einkavæðingarnefnd bréf í lok nóvember árið 2006 þar sem hann óskaði eftir viðræðum við nefndina um kaup á hlut ríkisins í Hitaveitu Suðurnesja. Bjarni segist hafa skrifað bréfið til að ýta á eftir því að söluferli á hlutnum í Hitaveitu Suðurnesja hæfist. Glitnir var á þessum tíma í miklum útrásarhug í orkugeiranum. Með söluferlinu hófst einkavæðingarferli íslenskra orkufyrirtækja.

Í samtali við DV segir Bjarni að hann hafi sent bréfið til einkavæðingarnefndar því að hlutur ríkisins í Hitaveitu Suðurnesja hafi lengi verið á sölulista en að ekkert hafi verið gert í því að selja hann. „Mig minnir að ég hafi sent bréfið til að ýta á eftir þessu,“ segir Bjarni og bætir því við augljóslega hafi verið áhugi fyrir því innan bankans að kaupa hlutinn þar sem Glitnir hafi síðar stofnað Geysi Green ásamt FL-Group.

Hann segist ekki tjáð sig hvort hann hafi sent bréfið fyrir hönd Glitnis eða fyrir hönd einhvers viðskiptavinar bankans. Bjarni segist ekki hafa komið nærri kaupum Geysis Green á hlut ríkisins í Hitaveitu Suðurnesja. Hann hætti sem forstjóri Glitnis þann 30. apríl, sama dag og Árni Mathiesen tók tilboði Geysis Green í hlut ríksins í hitaveitunni.

Bréfið er hluti þeirra gagna um söluna á hlut ríkisins í Hitaveitu Suðurnesja sem forsætisráðuneytið hefur veitt DV fullan aðgang að. Í næstu tölublöðum DV verður fjallað ítarlega um þessa sölu á hlut ríkisins en hún hefur löngum verið tortryggð.