Hjónin Russell og Carolyn Janke lentu í heldur betur furðulegu atviki á ferð sinni um bæinn Window Rock í Arizona-ríki Bandaríkjanna í vikunni. Risavaxið McDonalds skilti fauk nefnilega um koll og lenti rakleiðis á jeppabifreið þeirra og gjöreyðilagði. Hjónin slösuðust illa í slysinu.

Janke-hjónin stoppuðu við McDonalds veitingastað í Window Rock á miðvikudaginn til að fá sér hádegismat. Mikill stormur var og þar sem hjónin sátu í jeppabifreið sinni á bílastæði veitingastaðarins fauk skiltið, sem eins og margir vita er risavaxið gult M, um koll og kramdi jeppann.

Voru þau flutt á sjúkrahús, Russel Janke var með meðvitund en hlaut stóran skurð á höfuðið, en eiginkona hans Carolyn rotaðist og brotnaði á hrygg og bringubeini. Þau eru 72 og 69 ára gömul.