Björgólfur Guðmundsson vissi af 25 milljón króna styrk Landsbankans til Sjálfstæðisflokksins árið 2006 að sögn Sigurjóns Árnasonar fyrrverandi bankastjóra.

Þetta kom fram í kvöldfréttum Stöðvar 2 nú fyrir stundu sem tókst þó að fá það upp úr Sigurjóni sem að öðru leyti vildi ekki veita fréttastofunni viðtal á tröppunum heima hjá sér. Einungis að styrkurinn hafi verið veittur með vitund og vilja Björgólfs. Málið væri innanflokksmál Sjálfstæðisflokksins og hann vildi ekki blanda sér í það.

Réttilega er bent á það á Vísir.is að Sigurjón Árnason, maðurinn sem veitti styrkinn, og Geir Haarde, maðurinn sem axlaði ábyrgð á að veita honum viðtöku, eru miklir nágrannar við Granaskjólið í Vesturbænum.