Lögreglan á höfuðborgarsvæðinu stöðvaði umfangsmikla kannabisræktun í einbýlishúsi í Breiðholti síðdegis á fimmtudag. Við húsleit á áðurnefndum stað fundust tæplega þrjú hundruð kannabisplöntur á ýmsum stigum ræktunar.

Lögreglan lagði einnig hald á fimmtán gróðurhúsalampa, rúmlega þrjú hundruð grömm af marijúana og tvö kíló af kannabislaufum. Karl á fertugsaldri var yfirheyrður í tengslum við rannsókn málsins.

Fyrrnefnd aðgerð er liður í að hamla gegn sölu og dreifingu fíkniefna en sem fyrr vill lögreglan minna á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál.

Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.