Byssumaðurinn, sem lifði af hryðjuverkaárásirnar í Mumbai í nóvember, segir að hann hafi mátt þola grófar pyntingar af lögreglu. Þess vegna hafi hann játað aðild sína að málinu. Allir hinir hryðjuverkamennirnir sem voru handteknir voru skotnir til bana af lögreglu. 166 létust í árásunum.

Réttarhöld yfir manninum, sem heitir Mohammad Ajmal Kasab, eru hafin en í dag dró maðurinn játningu sína til baka. Samkvæmt ákæru kom Kasab til Indlands með hraðbáti frá Pakistan til að taka þátt í árásunum. Saksóknarar telja að pakistanska leyniþjónustan hafi skipulagt árásirnar.

„Við höfum sönnungargögn um að þetta hafi verið samsæri og hrein og klár stríðsárás sem miðaði af því að ná yfirtökum yfir Kasmír-héraðinu. Þetta var mjög vel skipulögð árás af pakistönsku leyniþjónustunni,“ sagði saksóknarinn Ujjwal Nikam í dómssal í dag. Hvað sem því líður hafa Pakistanar ítrekað neitað aðild að málinu.

Kasab gæti átt yfir höfði sér dauðadóm vegna aðildar sinnar að málinu en dómari neitaði beiðni verjanda hans, um að hann skildi dæmdur í unglingaréttir þar sem hann var einungis sautján ára þegar árásirnar voru gerðar.

Málið þykir stórt og umfangsmikið en réttarhöldin munu líklega dragast á langinn vegna þess.