Um sextíu þúsund manns hafa skrifað nafn sitt á undirskriftalista á vegum dagblaðsins Manchester Evening News til að bjarga hinum heimsfræga Christie-spítala í Manchester. Spítalinn tapaði 6,5 milljónum punda, eða rétt rúmlega einum milljarði íslenskra króna, í bankahruninu. Stærstur hluti fjárins kom frá styrktaraðilum spítalans í gegnum góðgerðarsöfnun og var fjárfest í dótturfélagi Kaupþings í Bretlandi, Kaupþing Singer and Friedlander.

Meðal þeirra sem skrifað hafa undir eru Manchester United-stjörnurnar Nemanja Vidic og Dimitar Berbatov ásamt þjálfara Manchester City, Mark Hughes.

„Krabbamein hefur áhrif á svo margt fólk að það er mikilvægt að við styðjum Christie-spítalann svo hann fái peninginn aftur,“ segir Berbatov í samtali við Manchester Evening News en málið hefur vakið usla meðal íbúa Manchester-borgar enda er Christie-spítalinn leiðandi á sviði krabbameinsrannsókna.

Rúnar Ívarsson, varaformaður stuðningsmannaklúbbs Manchester United á Íslandi, skilur vel reiði Vidics og Berbatovs út í íslenska bankann. „Það er ekkert óeðlilegt við það að menn séu argir. Ég held ekki að fólk á Íslandi sé ofboðslega sátt við bankana og ég geri ráð fyrir að þessir úti séu alveg jafn ósáttir.“