Jim Fouts, bæjarstjóri Warren í Michigan, sýndi gott fordæmi á dögunum þegar lögreglan stöðvaði hann fyrir hraðakstur. Lögreglan hugðist veita bæjarstjóranum viðvörun í stað sektar. Fouts samþykkt það til að byrja með en var með illan bifur og ákvað að hringja síðar um daginn og krefjast þess að fá sekt.

Fouts var að vísu ekki staðinn að meiriháttar umferðarlagabroti. Bifreið hans mældist á 72 kílómetra hraða þar sem hámarkshraðinn var 64, eða 40 mílna hraði. Fouts taldi að einhverjum kynni að þykja aðvörunin vinagreiði.

Lögreglan varð við beiðni Fouts og sektaði hann um 100 dali, eða um 12 þúsund krónur.