Lögreglan í Bogota, höfuðborg Kólumbíu, handtók yfir hundrað manns þegar stór og mikill hópur fólks reyndi að svindla sér inn á tónleika rokksveitarinnar Iron Maiden á laugardaginn. Þetta gerðist aðeins fáeinum klukkutímum fyrir tónleikana sjálfa sem voru haldnir í stórum almenningsgarði í höfuðborginni. Óeiðarlögregla beitti táragasi til að dreifa mannfjöldanum sem svaraði með því að kasta grjóti.

Óeirðirnar urðu til þess að nú íhuga stjórnvöld að banna alla þungarokkstónleika í höfuðborginni. Samkvæmt upplýsingum frá lögreglu voru um það bil tuttugu og fimm þúsund manns með miða á tónleikana. Liðsmenn Iron Maiden hafa ekki tjáð sig um óeirðirnar.