„Þótt henni sé það óljúft, neyðist Jóhanna Sigurðardóttir til að taka við formennsku af Ingibjörgu Sólrúnu Gísladóttir.“ Þetta segir Jónas Kristjánsson, bloggari og fyrrverandi ritstjóri, á heimasíðu sinni í dag. Miklar vangaveltur eru uppi um hver verður næsti formaður Samfylkingarinnar eftir að Ingibjörg Sólrún tilkynnti í gær að hún ætli að hætta í stjórnmálum af heilsufarsástæðum.

„Við aðstæður, þar sem enginn framámaður Samfylkingarinnar nýtur trausts, er Jóhanna eina skjólið. Hún hefur breitt bak með teflon-húð, sem flokkurinn þarf að misnota næstu tvö árin. Allir aðrir, sem girnast embættið, eru vanbúnir, benda á hana. Þar á meðal Dagur, Lúðvík og Jón Baldvin. Hún verður að þola að bera gamlan vanhæfnisflokk á bakinu. Þola að þreyja þorrann meðan hann sleikir sárin. Ég sé ekki, að hún geti hafnað örvæntingu laskaðs flokks á gjörgæzludeild,“ segir Jónas.