Sjálfstæðimenn á Alþingi krefjast þess að rædd verði þingmál sem varða atvinnumál og hag fyrirtækja og heimila en umræðu um breytingar á stjórnarskrá verði frestað. Samkvæmt dagskrá þingsins í dag er ætlunin að halda áfram umræðu um stjórnskipunarlög, þar á meðal umræðu um stjórnlagaþing og þjóðareign auðlinda.

Sigurður Kári Kristjánsson, Sjálfstæðisflokki, spurði auk þess hvort frumvarp um álver í Helguvík væri í raun stjórnarfrumvarp þar sem VG styddi það ekki. Frumvarpið gerir ráð fyrir að stjórvöldum verði heimilt að ganga til samninga við Century Aluminium - Norðurál um smíði álvers í Helguvík.
Century hefur slegið framkvæmdum þar á frest vegna verðfalls á áli og hraðminnkandi sölu.