Ástralskt rannsóknarteymi við Queensland háskóla í Ástralíu hefur komist að því að gamlir menn eignast heimskari börn en þeir sem yngri eru. Börn manna í eldri kantinum eru einnig líklegri til að verða einhverf og glíma við geðklofa.

Rannsóknarteymið fylgdist með 33 þúsund amerískum börnum í aldurshópunum átta mánaða, fjögurra ára og sjö ára. Niðurstöður rannsókna sýndu fram á að börn sem áttu aldraða feður stóðu sig verr í gáfnaprófum en þau börn sem áttu feður í yngri kantinum.

Í rannsókn teymisins var einbeiting, minni, skynsemi og lestrarhæfileikar barnanna prófaðir.

Niðurstöður ransóknarinnar koma John McGrath hjá háskólanum í Queensland mjög á óvart.

„Sagan segir að börn sem eiga gamla foreldra fái betri möguleika og meiri umhyggju sem styrkir andlega getu þeirra. Það er tilfellið hjá börnum sem eiga eldri mæður en ekki hjá börnum sem eiga eldri feður sem kemur mjög á óvart,“ segir McGrath við fjölmiðilinn New Scientist.

Að sögn McGrath er útskýringu á þessu að finna í að genagalli í frumum sem framleiða sæði sé algengari meðal eldri karlmanna. Það varpar líka ljósi á af hverju börn sem eiga gamla foreldra eru líklegri til að verða einhverf og glíma við geðklofa.

„Mér finnst að við höfum ekki nægar sannanir til að segja karlmönnum að verða ekki feður á efri árum. Ennfremur finnst mér það skylda mín að segja fólki frá að það er viss áhætta sem felst í því sem var ekki ljós áður,“ segir McGrath.