Vélbáturinn Hrönn ÍS sökk í höfninni á Ísafirði á laugardaginn. Lögreglan á Vestfjörðum fékk einnig tilkynningu um að vélbáturinn Jón forseti væri að sökkva en sá bátur var bundinn utan á Hrönn. Kallaðir voru til hafnarstarfsmenn og bátaflokkur Björgunarfélags Ísafjarðar til aðstoðar.

Hægt var að koma í veg fyrir að Jón forseti sykki og var hann færður annað í höfninni. Ekki er vitað um orsakir þess að Hrönn sökk en unnið verður að því að koma bátnum aftur á flot í dag.