Sádí arabískur dómstóll hefur dæmt 75 ára gamla konu frá Sýrlandi til 40 hýðinga með svipu. Auk þess þarf konan að sitja fjóra mánuði í fangelsi. Konunni var gefið að sök að hafa verið ein í húsi með tveimur karlmönnum sem voru henni ekki tengdir.

Það var á síðasta ári sem fulltrúi trúarlögreglunnar í Sádí Arabíu kom inn í íbúð konunnar. Þar voru tveir menn, þeir Fahd og Hadian. Fahd sagði að hann hefði þekkt konuna síðan hann var lítill og hann liti á hana sem móður sína. Hann hafi verið þar í kurteisisheimsókn. Hadian sagðist vera vinur Fahds og þeir hefðu komið með brauð handa henni.

Engu að síður taldi lögreglumaðurinn að konan hefði gerst brotleg við íslömsk lög. Þetta er ekki í fyrsta skipti sem sádí arabískir dómstólar kveða upp einkennilega dóma. Þannig var nítján ára stúlka, sem var fórnarlamb hópnauðgunar, dæmd til 200 hýðinga og sex mánaða fangelsis fyrir að hitta mennina. Árásarmennirnir fengu hinsvegar frá tíu mánaða til fimm ára fangelsis.