Samfylkingin er nú stærsti stjórnmálaflokkurinn en hún mælist með 30,5 prósenta fylgi í nýrri könnun MMR á fylgi stjórnmálaflokka og stuðningi við ríkisstjórnina.

Þar kemur fram að fylgi Framsóknarflokksins heldur áfram að dala en fylgi Vinstri grænna og Sjálfstæðisflokksins breytist lítið.

Rétt yfir helmingur svarenda segist styðja ríkisstjórnina.

Eins og áður segir mælist fylgi Samfylkinarinnar nú 30,5 prósent sem er veruleg aukning frá síðustu könnun í febrúar þegar fylgið mældist 24,1 prósent. Fylgi Framsóknarflokksins fer úr 14,9 prósentum í febrúar í 10 prósent nú.

VG mælist með 22,7 prósenta fylgi og Sjálfstæðisflokkurinn 29,3.

5,3 prósent geta hugsað sér að kjósa aðra stjórnmálaflokka en þá sem buðu sig fram síðast sem er minna en í síðustu könnun.