David Paradiso, karlmaður sem ákærður hafði verið fyrir að myrða kærustuna sína árið 2006 var skotinn til bana í réttarsal eftir að hann réðist að dómaranum í málinu. Atvikið átti sér stað í bænum Fresno í Kaliforníu í Bandaríkjunum.

Tildrög málsins eru þau að þegar vitnaleiðslur yfir Paradiso fóru fram tók hann eftir því að móðir hans yfirgaf réttarsalinn í uppnámi. Paradiso vildi að hlé yrði gert á réttarhöldunum en þegar dómari neitaði því brást hann illa við og réðist að dómaranum Cindu Fox.

Talsmaður dómsins, Karen McConnell, segir að Paradiso hafi slegið til dómarans og hugsanlega reynt að stinga hana. Dómarinn var fluttur burt á sjúkrabörum en fréttastofan Fox hefur eftir vitnum að hún hafi haft umbúðir á handleggnum.

Það var lögreglumaður sem skaut Paradiso til bana en hann hefur nú verið sendur í leyfi meðan málið er rannsakað.