Nafnverð íbúðarhúsnæðis á höfuðborgarsvæðinu hefur lækkað um tæplega 4 prósent frá hruni bankanna og um tæplega 6 prósent á síðastliðnum tólf mánuðum. Lækkunin er lítil miðað við það að hagkerfið er að ganga í gegnum eina erfiðustu kreppu sem það hefur tekist á við samkvæmt vef Greiningar Íslandsbanka.

Þróunin á landsbyggðinni hefur verið ámóta þróuninni á höfuðborgarsvæðinu. Ástæða þess að nafnverð hefur ekki lækkað meira en raun ber vitni liggur meðal annars í því að íbúðamarkaðurinn er mjög óvirkur um þessar mundir. Framboð á íbúðarhúsnæði er mikið en eftirspurnin hefur hinsvegar hrunið.
Kaupmáttarþróun, atvinnuástandið, væntingar um húsnæðisverðsbreytingar, skortur á lánsfé ásamt fleiri þáttum ráða þar för. 145 kaupsamningum var þinglýst í síðasta mánuði samanborið við 426 á sama tímabili árið 2008.

Samkvæmt vef Íslandsbanka hafa fjármálastofnanir ekki gengið fram með sama hætti og víða erlendis gangvart heimilunum í innheimtu húsnæðislána. Þvingaðar sölur hafa verið fátíðari hér en til dæmis í Bandaríkjunum undanfarið en þar hafa slíkar sölur verið ein af ástæðum þess hvað verð íbúðarhúsnæðis hefur lækkað skarpt.

Greining Íslandsbanka telur að frekari verðlækkun sé í farvatninu. Ástæðan er sögð sú að eftir þá verðbólu sem verið hefur á íbúðamarkaði undanfarin ár er raunverð íbúðarhúsnæðis umtalsvert hærra en langtímameðaltal, eða um 40 prósent fyrir því sem verið hefur undanfarna áratugi. Ljóst er að svo hátt íbúðaverð er ekki í takt við þá stöðu sem hagkerfið er komið í.