Guðmundur Gunnarsson, formaður Rafiðnaðarsambands Íslands, vill að stýrivextir verði lækkaðir niður í tólf prósent strax. Næsti vaxtaákvörðunardagur bankans er nítjánda mars en stýrivextir eru nú átján prósent. Guðmundur segir að verði krónan áfram gjaldmiðill Íslendinga muni stór íslensk fyrirtæki verða að flytja höfuðstöðvar sínar héðan.

Þetta segir Guðmundur á bloggsíðu sinni á Eyjunni. Hann bendir á að Seðlabanki Danmerkur hafi lækkað stýrivexti sína í dag niður í 2,25 prósent í kjölfar ákvörðunar Seðlabanka Evrópu um að lækka stýrivexti sína í 1,5 prósent. Danska krónan er tengd evrunni þó Danir séu ekki aðilar að myntbandalagi Evrópu. Englandsbanki lækkaði einnig stýrivexti sína í dag, í 0,5 prósent.

Guðmundur bendir á að á sama tíma séu stýrivextir á Íslandi 18 prósent. „Það eru þeir þó svo eldsneyti verðbólgunnar er þrotið og við búum við gjaldeyrishöft með kverkatökum á atvinnulífinu og heimilunum [ ... ] Telja íslenskir stjórnmálamenn reynsluna af krónunni virkilega svo góða, að halda eigi áfram að búa við hana. Það takist í næstu tilraun, við þurfum einungis að vanda okkur dáldið betur. Með upptöku Evru þá hefðum við mynt sem dugar í viðskiptum og við myndum eyða óvissu og skapa það traust sem við þurfum svo sannarlega á að halda,“ segir Guðmundur.