„Mér fannst þetta mjög ómakleg gagnrýni,“ segir Vilhjálmur Egilsson, framkvæmdastjóri Samtaka atvinnulífsins og formaður Endurreisnarnefndar Sjálfstæðisflokksins, um orð Davíðs Oddssonar á landsfundi flokksins í dag. Davíð sagði að skýrsla nefndarinnar væri mikil hrákasmíð og sagðist hann sjá mikið eftir þeim trjágróðri sem fór í prentun hennar.

„Allir kaflarnir í bókinni hafa ákveðna höfunda og það voru 80 manns sem komu að þessu og voru virk í vinnuhópnum við að setja þetta saman. Nöfnin eru öll í bókinni og þetta er allt saman fólkið sem hann er að gefa þessa einkunn. Þetta var feilskot hjá honum,“ sagði Vilhjálmur í kvöldfréttum Ríkisútvarpsins.