„Þeir eru að mjakast niður og það er búist við að konan komist í þyrlu klukkan 21,“ segir Ólöf Snæhólm, upplýsingafulltrúi Slysavarnarfélagsins Landsbjargar. Um 120 manns hafa í allan dag unnið að því að koma hópi göngumanna sem festist á toppi Skessuhorns til byggða. Hópurinn kallaði eftir aðstoð eftir að kona í hópnum slasaðist.

Eins og sjá má á meðfylgjandi mynd voru aðstæður á Skessuhorni mjög slæmar. Fólkinu er kalt og greip hópurinn til þess ráðs að grafa sig í fönn. Veður er afleitt á svæðinu, hvasst er auk þess sem töluverð snjóflóðahætta er. Ferð björgunarsveitafólksins hefur gengið hægt enda aðstæður erfiðar.
Ekki liggur fyrir hversu mikið konan er slösuð en þyrla Landhelgisgæslunnar bíður hennar.