Um hundrað björgunarsveitamenn af Vesturlandi og höfuðborgarsvæðinu vinna nú í því að ná 12 manna gönguhópi niður af Skesskuhorni. Hópurinn bað um aðstoð um klukkan 14:00 í dag þegar einn meðlimurinn féll og slasaðist.

Veður er afleitt á svæðinu, hvasst auk þess sem snjóflóðahætta er töluverð. Ferð björgunarsveitafólksins sækist hægt enda aðstæður erfiðar. Allar tiltækar leiðir eru notaðar til að komast að fólkinu; snjóbílar, fjórhjól og vélsleðar. Ekki er þó talið að hægt sé að komast síðasta spölinn að hópnum nema gangandi.

Þyrla LHG hefur beðið fyrir neðan fjallið á þjóðveginum en veður hamlar för hennar að göngufólkinu.
Eins og fyrr segir er ein kona slösuð og aðrir í hópnum eru kaldir og þrekaðir og þurfa hjálp. Hópurinn hefur grafið sig í fönn og hefur því eitthvað skjól.