Björgunarsveitir Slysavarnafélagsins Landsbjargar eru nú komnar að gönguhóp sem hafst hefur við efst í Skessuhorni frá því klukkan 14 í dag. Verið er að undirbúa flutning fólksins niður af fjallinu en bera þarf konuna sem slasaðist nokkur hundruð metra í mjög erfiðum aðstæðum, snjóflóðahættu og ísingu til að koma henni í snjóbíl.

Samkvæmt nýjustu upplýsingum er líðan konunnar stöðug og aðrir í hópnum eru kaldir og þrekaðir. Gert er ráð fyrir að nokkurn tíma taki að koma fólkinu til byggða. Um 120 björgunarsveitamenn hafa tekið þátt í aðgerðum í dag.