Meðfylgjandi myndir náðust af forsetabifreið Ólafs Ragnars Grímssonar í Bankastræti um fimmleytið í gærdag. Þar sést hvar 11,7 milljón króna Lexus LS600h lúxusbifreið forsetans er lagt í stæði fyrir fatlaða.

Samkvæmt vitnum í Bankastræti í gær beið einkabílstjóri í stæðinu í allt að sex mínútur á meðan forsetahjónin sinntu einkaerindum í nærliggjandi verslunum.

Lögin skýr
Guðbrandur Sigurðsson hjá umferðardeild lögreglunnar á höfuðborgarsvæðinu segir lögin skýr hvað varðar lagningu í stæði ætluð fötluðum. Það á enginn að leggja í stæði fatlaðra án þess að hafa til þess heimild í formi P-merkis sem sýnilegt er í framrúðu bifreiðarinnar. Í þessu tilfelli hefði verið hægt að sekta forsetann með svokölluðu C-gírógjaldi sem rennur í bílastæðasjóð Reykjavíkur.

Þá bendir Guðbrandur á að til standi að hækka það gjald sem tekið er gerist menn sekir um að misnota stæði fatlaðra.

Algjör lúxus
Ólafur Ragnar Grímsson fékk forsetabifreiðina afhenta í byrjun júlí árið 2007 frá forstjóra Toyota í Evrópu. Forsetaembættið keypti bifreiðina með talsverðum afslætti en hún kostaði engu að síður 11,7 milljónir króna. Verðlistaverð lúxusbifreiðarinnar, sem búin er svonefndu hybrid-kerfi, er um 22,6 milljónir króna.

Ritara forsetans var ekki kunnugt um málið þegar spurst var fyrir um það.