„Þetta er fjórða sætið á framboðslistanum í öðru hvoru kjördæminu sem er þingsæti í dag. Miðað við skoðanakannanir ættum við að vera með níu þingmenn í Reykjavík. Svo á auðvitað eftir að kjósa,“ segir Ásta Ragnheiður Jóhannesdóttir félagsmálaráðherra. Ásta lenti í áttunda sæti í prófkjöri Samfylkingarinnar í Reykjavík í gær.

Ásta fer því niður um eitt sæti miðað við kosningarnar fyrir tveimur árum. Þegar fyrstu tölur bárust í gær var hún mun neðar á listanum og leit um tíma út fyrir að hún næði ekki mögulegu þingsæti. Inn í þeim tölum voru að vísu einungis tölur úr netkosningunni en seinna meir komu inn tölur úr pappírskosningunni og færðist Ásta þar með upp listann.

Aðspurð hvort Ásta hafi átt von á betri kosningu segir hún að það hafi verið ómögulegt að geta sér til um niðurstöðuna fyrirfram. „Ástandið í samfélaginu er náttúrulega þannig að það gat allt gerst. Ég var ekki inni þegar nettölurnar komu þannig að ég kom inn á pappírnum.“

Ásta segist ekki hafa orðið stressuð þegar fyrstu tölur bárust. „Nei. Ég veit alveg hvaða fólk kýs mig. Það er fólkið sem þarf að treysta á velferðarkerfið og sjálfsagt einhverjir fleiri. En ég veit að ég hef mestan stuðning þar og það var kannski dálítið erfitt fyrir þann hóp að taka þátt í kjörinu. Þetta var varnarsigur og þarna fékk flokksfólkið góða endurnýjum,“ segir Ásta.