Lögreglan í mexíkósku borginni Ciudad Juarez fann níu lík í eyðimörk rétt utan við borgina í gær. Um er að ræða lík af sjö körlum og tveimur konum en fólkið hafði allt mátt þola pyntingar. Talið er að einhverjir hinna látnu séu lögreglumenn en lögregluskildir fundust einnig á vettvangi.

1,3 milljónir manna búa í borginni sem er rétt hjá landamærum Mexíkó og Bandaríkjanna. Mikil ofbeldisbylgja hefur riðið yfir borgina að undanförnu sem talið er að eigi rætur sínar að rekja til stríða milli fíkniefnagengja.