Fjöldi manns sem taldi sig vera í Samfylkingunni reyndist ekki vera á kjörskrá þegar það ætlaði að greiða atkvæði í prófkjöri flokksins í Suðvesturkjördæmi í gær. Um er að ræða tæplega 150 manns en svo gæti farið að röð frambjóðenda breytist ef atkvæðin, sem lýst voru ógild, verða talin með.

Frá þessu var greint í kvöldfréttum Stöðvar 2 í kvöld. Helgi Pétursson formaður kjörstjórnar segist telja að fimm til átta atkvæði af þeim tæplega 150 hafi verið úrskurðuð gild. Óánægjan er sögð mikil meðal stuðningsmanna Lúðvíks Geirssonar bæjarstjóra í Hafnarfirði. Hann lenti í þriðja sæti í kjörinu en einungis munaði 57 atkvæðum milli hans og Árna Páls Árnasonar sem hlaut fyrsta sætið.

Búist er við að kjördæmaráðið skoði málið betur.