Karlmaður skaut fjóra til bana á fjölskyldusamkomu í Miami á Flórída í nótt áður en hann fór heim til sín og svipti sig lífi. Talið er að maðurinn hafi verið afbrýðisamur út í eiginkonu sína sem hafði nýverið farið frá honum.

Lögreglan fékk tilkynningu um skotárás í húsi skömmu eftir miðnætti í nótt. Þegar hún kom á vettvang fundust fjögur lík. Skömmu síðar fékk lögreglan tilkynningu um að skotum væri hleypt úr byssu skammt frá og að eldur væri laus í húsi. Var þar um að ræða morðingjann sem hafði svipt sig lífi.

Talið er að árásarmaðurinn sé af kúbverskum uppruna en samkvæmt frétt Fox News var hann reglusamur og ávallt í skilum varðandi greiðslur á íbúðinni sem hann leigði. Ekki liggur fyrir hvort fórnarlömbin tengist manninum en samkvæmt upplýsingum frá lögreglunni hafði eiginkona hans nýverið farið frá honum.